News

Check out real estate news updates

ទេសរដ្ឋមន្ត្រី ស៊ុន ចាន់ថុល ចុះពិនិត្យផ្លូវជាតិលេខ៥៨ និងជំរុញឱ្យក្រុមហ៊ុនចិនកែលំអរចំណុចមួយចំនួន

(បន្ទាយមានជ័យ)៖ ក្នុងដំណើរចុះពិនិត្យគុណភាពផ្លូវដែលសាងសង់រួច និងកំពុងសាងសង់នៅភាគពាយ័ព្យប្រទេសនៅថ្ងៃចន្ទ ទី២២ ខែកក្កដា ឆ្នាំ២០១៩នេះ បន្ទាប់ពីបានពិនិត្យផ្លូវជាតិលេខ៥៥ និងផ្លូវជាតិលេខ៥ហើយនោះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបន្តដំណើរពិនិត្យមើលជាតិលេខ៥៨ ដែលជាផ្លូវជាតិមួយតភ្ជាប់ពីផ្លូវជាតិលេខ៥ ក្នុងក្រុងប៉ោយប៉ែត ខេត្តឧត្តរមានជ័យ ទៅខេត្តឧត្តរមានជ័យ។

ដំណើរចុះត្រួតពិនិត្យផ្លូវជាតិលេខ៥៨នេះ ក៏មានការអញ្ជើញចូលរួមពីតំណាងក្រុមហ៊ុនម៉ៅការសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីនៃមន្ទីរសាធារណការ និងដឹកជញ្ជូនខេត្តឧត្តរមានជ័យ និងបន្ទាយមានជ័យផងដែរ។

បន្ទាប់ពីបានដើរពិនិត្យដោយថ្មើរជើងនៅចំណុចមួយចំនួនលើដងផ្លូវនេះហើយ លោកទេសរដ្ឋមន្ត្រី បានពិនិត្យឃើញមានបញ្ហាបច្ចេកទេសមួយចំនួនទាក់ទងនឹងការសាងសង់ ហើយបានណែនាំឲ្យក្រុមហ៊ុនម៉ៅការសាងសង់ ក្រុមហ៊ុនទីប្រឹក្សាបច្ចេកទេស និងភាគីពាក់ព័ន្ធកែសម្រួលបំពេញបន្ថែមនូវលក្ខណៈបច្ចេកទេសឱ្យបានត្រឹមត្រូវ ដើម្បីធ្វើឱ្យផ្លូវនេះ មានគុណភាពរឹងមាំ និងប្រើប្រាស់ជាប់បានយូរអង្វែង។

សូមបញ្ជាក់ថា ផ្លូវជាតិលេខ៥៨ មានប្រវែងសរុបជាង ១៧៤គីឡូម៉ែត្រ និងទទឹង ១២ម៉ែត្រ ក្នុងនោះផ្លូវមេប្រវែងជាង ១៦៥គីឡូម៉ែត្រ និងផ្លូវខ្នែងប្រវែងជិត ៩គីឡូម៉ែត្រ សាងសង់ឡើងក្រោមប្រាក់កម្ចីសម្បទានពីរដ្ឋាភិបាលនៃចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សរុបជាង ១២២លានដុល្លារសហរដ្ឋអាមេរិក។ ផ្លូវនេះ ជាប្រភេទផ្លូវក្រាលកៅស៊ូពីរស្រទាប់ (DBST) គិតចាប់ពីផ្លូវជាតិ លេខ៥ ត្រង់គ.ម ៣៩៩+៩០០ ក្រុងប៉ោយប៉ែត ខេត្តបន្ទាយមានជ័យ ទៅកាន់ផ្លូវជាតិលេខ៦៨ ត្រង់គ.ម ១០១+៥០០ (ផ្លុង) ខេត្តឧត្តរមានជ័យ។

គម្រោងផ្លូវនេះបានចាប់ដំណើរការបើកការដ្ឋានសាងសង់នៅថ្ងៃទី១០ ខែមិថុនា ឆ្នាំ២០១៥ និងត្រូវបានបញ្ចប់ការងារសាងសង់ជាស្ថាពរ១០០%នៅថ្ងៃទី០៨ ខែកុម្ភៈ ឆ្នាំ២០១៩ កន្លងទៅនេះ។

លោកទេសរដ្ឋមន្ត្រី ស៊ុន ចាន់ថុល បានអះអាងថា កំណាត់ផ្លូវនេះចូលរួមចំណែកយ៉ាងសំខាន់ក្នុងការសម្រួលដល់ការធ្វើដំណើររបស់បងប្អូនប្រជាពលរដ្ឋនៅ តំបន់ភាគពាយ័ព្យប្រទេស ព្រមទាំងការដឹកជញ្ជូនកាន់តែប្រសើរមួយកម្រិតទៀត។ ជាពិសេសកំណាត់ផ្លូវ នេះអាចសម្រួលដល់ការតភ្ជាប់ជាមួយព្រះរាជាណាចក្រថៃ ក្នុងការពង្រីកសក្ដានុពលសេដ្ឋកិច្ចពាណិជ្ជកម្មថែមទៀតរបស់ប្រទេសជាតិ៕

Leave a Reply

Your email address will not be published. Required fields are marked *