News

Check out real estate news updates

ក្រុមហ៊ុន​ថៃ​បោះទុន ១០លាន​ដុល្លារ​សាងសង់​ផ្សារ​ទំនើប Big C នៅ​ក្រុង​ប៉ោយប៉ែត

ភ្នំពេញ៖ ក្រុមហ៊ុន​ដ៏​ធំ​របស់​ថៃ បានសម្រេច​បោះទុន​វិនិយោគ​លើទឹក​ប្រាក់​ប្រមាណ ៩លាន​ដុល្លារ ដើម្បី​សាងសង់​ផ្សារ​ទំនើប Big C នៅ​ទីក្រុង​ប៉ោយប៉ែត ខេត្តបន្ទាយមានជ័យ។

អ្នកវិនិយោគ​ក្នុងស្រុក លោក សុខ ហ៊ាង ដែលជា​កូនប្រុស​អភិបាលក្រុង​ប៉ោយ ប៉ែត ខេត្តបន្ទាយមានជ័យ បាន​ឲ្យ​ដឹង​តាម​ប្រ​ព័​ន្ឋ​តេ​ឡេ​ក្រាម នា​ល្ងាច​ថ្ងៃទី១២ វិច្ឆិកា​កន្លងមក​ថា លោក​បាន​ជួប​ជាមួយ​អ្នកវិនិយោគ​ថៃ​រួចហើយ ពួកគេ​បាន​ប្រាប់ថា​ផ្សារ​ទំនើប​នេះ នឹង​ចាប់ផ្តើម​សាងសង់​កំឡុង​ខែធ្នូ​ខាងមុខនេះ ហើយ​ភាពយឺតយ៉ាវ​នៃ​ការសាងសង់​ផ្សារ​នេះ ដោយសារ​ក្រុមហ៊ុន​មិនទាន់​ទទួលបាន​អាជ្ញាប័ណ្ណ ពី​រដ្ឋាភិបាល​កម្ពុជា។

លោក​បន្តថា “តាម​ខ្ញុំ​បាន​ជួប​ជាមួយ​អ្នកវិនិយោគ​ថៃ​បាន​ឲ្យ​ដឹងថា ផ្សារ​ទំនើប​នេះ នឹង​សាងសង់​លើ​ផ្ទៃដី២,៥ហិកតា ក្នុងនោះ​ដី​សម្រាប់​សាងសង់​ផ្សារ​មាន​ទំហំ១,៥ហិកតា និង​ដី១ហិកតា​ទៀត​បំ​រ៉ុង​ទុក​សម្រាប់​ចំណត​យានយន្ត។លោក​បន្តថា “ផ្សារ​នេះ​ស្ថិតនៅក្នុង​សង្កាត់​ប៉ោយប៉ែត ក្រុង​ប៉ោយប៉ែត ស្ថិត​នៅជាប់​គំរោង Empire”។

លោក​សុខ ហ៊ាង​បាន​បន្តថា តាម​ព៌​ត​មាន​ដែល​លោក​ទទួលបាន​គឺ​ផ្សារ​ទំនើប​នេះ នឹង​សាងសង់​រយៈពេល៩ខែ​ប៉ុណ្ណោះ ដោយ​ពួកគេ​គ្រោង​សាងសង់​ទាំងយប់​ទាំង​ថ្ងៃ។

ក្រុង​ប៉ោយប៉ែត​បច្ចុប្បន្ន មាន​ប្រជាពលរដ្ឋ​រស់នៅ​ប្រមាណ២០ម៉ឺន​នាក់ ក្នុងនោះ​អ្នកវិនិយោគ​អន្តរជាតិ​មាន​ប្រមាណ៥ម៉ឺន​នាក់ ដែល​ធ្វើ​ឲ្យ​ទីក្រុង​នេះ​កាន់តែ​មាន​ភាព​រីកចម្រើន​យ៉ាង​លឿន ពិសេស​វិស័យ​សំណង់​និង​អចលនទ្រព្យ។ បច្ចុប្បន្ន​មាន​គំរោង​ខុន​ដូ​ជាច្រើន​កំពុង​សាងសង់ ដែល​ធ្វើ​ឲ្យ​មុខមាត់​ទីក្រុង​នេះ​មានការ​ផ្លាស់ប្តូរ​ទាំងស្រុង។

យោងតាម​ទិន្នន័យ​ពី​សាលាក្រុង​ប៉ោយប៉ែត​បាន​ឲ្យ​ដឹងថា បច្ចុប្បន្ន​ក្រុង​ប៉ោយប៉ែត​មាន​អាគារ​កំពស់​ចាប់ពី៥ដល់​ជាង២០ជាន់​ចំនួន៦០អាគារ​ហើយ។

លោក សាន ស៊ា​ង​ហូ អភិបាលក្រុង​ប៉ោយប៉ែត​បាន មានប្រសាសន៍​ឲ្យ​ដឹង​កាលពីពេលថ្មីៗនេះ​ថា ទីក្រុង​ប៉ោយប៉ែត​កំពុងមាន​ការរីកចម្រើន​លឿន ដោយសារ​កំនើន​នៃ​ការវិនិយោគ​ពី​អ្នកវិនិយោគ​ជាតិ និង​អន្តរជាតិ ពិសេស​បច្ចុប្បន្ន​មាន​ក្រុមហ៊ុន​ក្នុងស្រុក​មួយ​គំ​ពុង​រៀបចំ​សាងសង់​ព្រលានយន្តហោះ​ឡើងវិញ ដែល​តាម​គំរោង​ក្រុមហ៊ុន​នេះ នឹង​សាងសង់​ព្រលានយន្តហោះ​នេះ​នៅក្នុង​រដូវប្រាំង​ខាងមុខនេះ។

លោក​បន្តថា “ជាមួយនឹង​ល្បឿន​នៃ​ការអភិវឌ្ឍ និង​ការរៀបចំ​ហេ​ដ្ឋា​រចនា​ស​ម្ព័​ន្ឋ​ក្រុង​កាន់តែ​ល្អប្រសើរ ពិសេស​ផ្លូវ​ក្នុង​ក្រុង​បានធ្វើ​ឲ្យ​តម្លៃ​ដីធ្លី នៅក្នុង​ទីក្រុង​នេះ​កើនឡើង​យ៉ាងខ្ពស់”៕

Leave a Reply

Your email address will not be published. Required fields are marked *